Katuami eqqumiitsuliaqarpoq arlalinnik kusanartunik, pulaartuulluni maluginiagassanik. Siullermik Hans Lyngep Inersuani scenep tippersua angisooq eqqumiitsuliortumit Aka Høeghmit sanaajusoq. Suliaq kusanarluinnartoq Danmarkip-Kalaallit Nunaatalu Kulturikkut Aningaasaateqarfianit aningaasaliiffigineqarsimasoq.
Saaffiginnittarfiup qulaani betonimut seqineq qaammallu pillugit kalaallit oqaluttuatoqaat, Buuti Pedersenimit sanaajusoq, kingartorneqarsimavoq.
Isertarfiup pingaarnerup silataaniipput qajaasaliat eqqumiitsuliortumit Isle Hessnerimit sananeqarsimasut. Qajaasaliat issiavigineqarsinnaasunngorlugit sanaajupput.
Eqqumiitsuliat arfineq-marluk Aage Gitz-Johansenimit (1897-1977) Aage Gitz-Johansenip Aningaasaateqarfiannit cafép pingasunik teqeqqullip qulaani nivingasussanngorlugit tunniussaapput.
Majuartarfiit qipisuusat eqqaanni ilusilersugaq "Red Wolfe" Larry Ahkvakanamit, Alaskameersumit, North Slope Regional Corporationimeersumit tunissutaavoq.
