Katuaq logo Kulturip Illorsua - Kulturikkut pikialaartitsisoq

Kunngi & Mike

Killeqarfeqanngitsoq

Ukiut tallimat sinnereerpaat naapeqqaarnerinit. Tamanna pivoq Mike Kunngikkunnut kasuttornerani, Kunngillu matuni ammarlugu angerlarsimaffimminut Mike tikilluaqqummagu. Inuit marluk ilumikkut eqqumiitsuliornikkullu assigiinngilluinnartunik tunuliaquteqaraluarlutik imminnut ammaffigillutik naapeqatigiipput. Uani eqqumiitsuliullammaap misilittagaqarluartup eqqumiitsuliortullu nutaqqap akornanni naapinnerat pineqarpoq. Naapinneq taanna silarsuarmut killeqarfeqanngitsumut aammaassivoq. Mike-p Kunngillu naapinnerat eqqumiitsuliat nutaat pinngornerinik kinguneqarpoq, tamannalu takuneqarsinnaavoq Kunngip eqqumiitsuliaani ilisarnartoqanngitsuusaraluartuni uumasut silarsuaanniit ilisarnartunik akuusoqalersimaneranik. Mikep nutaatut imminut assililluni iluatsippallaanngikkaluarlugu assilialiorsimavoq. Marluullutik misileraasimapput ilaatigullu iluatsitsivallaartannginnertik akueralugu qungujummik tiguinnartarlugu. Naapeqatigiissimaaraangamik killeqarfeqanngitsumik silarsuarminniilertarnertik imminnullu ilisariissimalersimanertik eqqartueqatigiilluarsinnaanertillu nuannaarutigaat, KATUAQ-milu saqqummersitseqatigiinnissartik qilanaaralugu.

Frederik Kunngi Kristensen

Eqqumiitsuliortoq tamatigoortoq Frederik Kristensen, »Kunngi«

Kunngip assilialiai assigiinngeqaat. Piviusorpalaartuniit ilisarnatuniit abstrakt-isunut kipparissortaqagajuttunut ilisarnartuliaanngitsunut.

Frederik "Kunngi" Kristensen, 1974-imi, taamani Grafisk værksted-iusumi, ullumikkut Eqqumiitsuliornermik Ilinniarfiusumi, ilinniartut siulliit ilagaat.

Inuusuttuaraallungali kipparissup allanngortikkuminannera alutorisaqaara, Kunngi iluseq kipparissuusoq pillugu oqarpoq.

Dansk-it eqqumiitsuliortut akornanni Kunngi ilisimaneqarpallaanngilaq, Kalaallilli Nunaanni Kunngiuvoq! Taaguut taanna kunngi Frederik IX-aat Kalallit Nunaanni angalanermi nalaani inoorlaajusoq tigummimmanili taaguutigilersimavaa.

Kunngi oqaluttuarpoq arfineq marlunik ukioqarluni tikimik ajoqusersimanera eqqumiitsuliornerup inuussutigilersimaneranut peqqutaasimasoq, angajoqqaavisami pisup taassuma kingorna ilungersunarpallaanngitsumik inuussuteqarnissaa aaliangersimavaat. Taamaammat 1960-kkunni akkami Uummannap qaqqaanik assilialiorluni qalipaanerani alutoralugu isiginnaartillugu qalipaalluni assilialiortartunngornissani aaliangiussimavaa.

Kunngi ilaatigut Nuummiittumi det Grafiske Værksted-imi ilinniarpoq aasakkullu København-imiittumi Kunstakademimi pikkorissartarluni. Kingorna Kalaallit Nunaat tamakkerlugu Danmark-imilu nammineerluni allallu peqatigalugit saqqummersitsisarpoq. Kunngi kusassaasiortarpoq, frimærk-inik, atuakkanillu assiliartaliortartuulluni suliffeqarfiillu ilisarnaatiliuuttarlugit.

Assilialiornermi saniatigut nipilersuusiorlunilu taalliortarpoq, cd-nillu taalliaminillu katersanik saqqummersitsisarluni.

Peqatigiiffimmit Kalaallit Atuakkiortunit 2009-mi nersornaaserneqarpoq.

– Eqqumiitsuliami saniatigut ”Kunngi” taalliortarpoq assilialiamilu saniatigut qasusuilluni taalliarpassuani katersoriarlugit atuaganngorlugit saqqummersissimavai, soorlu aamma ilaatigut atuagassiami ”Kalaaleq”-mi taalliai aamma saqqummertartut, Peter Frederik Rosing, Kalaallit Atuakkiortuneersoq nalunaarpoq.

Mike Jakob Kristiansen

Illussanik titartaasartoq qalipaallunilu assilialiortartoq Mike Jakob Kristiansen 1971-imi Sisimiuni inuuvoq tassanilu peroriartorluni. Illussanik titartaasartutut Arkitektskolen-imi Aarhus-imiittumi 1998-imi naammassivoq. Sunngiffini meeqqaminut nutaanillu pilersitsinernut atortarpaa. Mike Kommuneqarfik Sermersuumi Sanarfinermut Avatangiisinullu ingerlatsivimmi Direktør-itut atorfeqarpoq.

Mike titartaanermik nuannarisaqartuarsimavoq. Meeraagallarami Batman-kkut biilillu titartarnerusarsimavai, namminerlu isummani atorlugu illussanik titartaanissani ilinniarnermi nalaani aallutarinerulersimallugu.

Ukiup 2010-p aallartinnerata nalaa tikillugu nammineq isummani atorlugu qalipaatit qaqortoq qernertorlu kisiisa atorlugit titartaasalersimavoq, inernerisimallugulu Aasiaat Sisimiullu katersugaasiviini ”Tupilak 2010”-mik taaguusersimasaminik saqqummersitsimanera. Mikip suliamini uumasut kalaallit oqaluttuatoqaaneersut, kalaallit nunaata uumasui aammalu kalaallit arnartaasa ammerisarneri allapalaagaallu isumassarsiorfigisarpai.

Ukioq 2012-imi Mikep suliamini qalipaatit allat atortalersimavai. Tamatuma nalaani aamma tupilaat assilialiarisalerpai eqqumiitsulioriaatsillu assigiingitsut, qalipaatit, assersuuteqarneq, uumasut aamma misigisat akoorlugit suliaani takussaalerlutik.

Kultur-ikkut illorsuup KATUAP saqqummersitsinerani ”Tupilak 2015”-mut Mikep suliai qalipakkat qaqortut/qernertut aamma qalipaatillit, titartakkat akvarel-illu saqqummersinneqarput.

Saqqummersitsinerit kingorna inunnit amerlasuunit saaffigineqartarsimavoq, tupilaat kiisami allakkajaamik  suliarineri alutorinerarlugit, aammalu Mikip ilutsinik assigiinngitsunik uumasunillu suliaminut ilanngussisarnera torrallaasimanerarlugu.

Atuagassiaq ”Neriusaaq”-p saqqaa 2014-p ingerlanerani saqqummersinneqartoq, ilaatigut Mikep apersorneqarneranik imalik, Mikip suliarpassuisa ilaanik assiliartaqarpoq.

Saqqummersitsineq ”Killeqarfeqanngitsoq” Katuami oktober-ip 8-niit november-ip 30-ata tungaanut alakkarneqarsinnaavoq.

mike@greennet.gl

Nutaarsiassanik pisartagaqalerit

Cookies

katuaq.gl bruger cookies

Cookies er nødvendige for at få hjemmesiden til at fungere og giver info om, hvordan du bruger vores hjemmeside, så vi kan forbedre den både for dig og for andre. katuaq.gl bruger primært cookies til trafikmåling, login og optimering af sidens indhold. Hvis du klikker videre på siden, accepterer du vores brug af cookies.