Hans Lynge Inersua aaqqissuussinernut assigiinngitsorpassuarnut tulluuppoq, soorlu nipilersortunut, isiginnaartitsisunut, qitittunut, filmertitsinernut, oqalugiartitsinernut tusarnaartitsinernullu annerumaanut. Tusarnaartitsinernut, inunnut issiallutik nipilersortunik tusarnaarusuttunut immikkut ittumik tulluuppoq. Inersuup ateqaatigaa eqqumiitsuliortoq tamatigoortoq atuakkiortorlu Hans Lynge (1906-1988), kalaallit eqqumiitsuliornikkut ineriartornerannut pingaaruteqarsimaqisoq.
Hans Lyngep Inersuata iminnassusaa nipilersortunik tusarnaartitsinernut pitsaanerpaaffimminiippoq, silataatungaaniillu nigalinngorlugu (rotondenngorlugu) sanaajulluni saatungaanilu qaqortumi pinnersaataasumik assiliaqarpoq. Assilialiaq eqqumiitsuliortumit Buuti Pedersenimit kalaallit oqaluttuatoqaat seqernup qaammatillu, "Maliina & Aningaaq"-mik taaguutilimmit tunngaveqarluni. Isiginnaartitsisarfiup tippersua Hans Lynge Inersuaniittoq Kalaallit Nunaata eqqumiitsuliortuanit tusaamasaasumit Aka Høeghmit sanaajuvoq. Tippe taanna tungujortoq taartuuvoq qeqqanilu ullorissap anaa ikumasoq assiliartaalluni. Tippi kusanartorsuaq, isiginnaartitsisoqaleraangat atuuffissaminut atorluarneqartartoq.
Hans Lynge Inersuani inunnut 508-nut issiaveqarpoq, pitsaanerpaanillu nipip qulliillu tungaatigut aaqqissuussinernut taaneqareersunut atortorissaaruteqarluni.
