Katuaq logo Kulturip Illorsua - Kulturikkut pikialaartitsisoq


Qooqqut Festival

Ilaquttat tamarmik peqatigalugit illoqarfik qimallugu ataatsimuaalaarneq, akeqanngitsoq imigassartaqanngitsorlu peqataaffigiuk

Ulloq:

Sumi: Qooqqut
Periode


Akeqanngilaq

Ilaqutariit ataatsimoorfiat

Katuaq Kulturip Illorsuata Qooqqut Nuan aamma Arctic Umiaq Line A/S suleqatigalugit Qooqqut Festival, sap.ak. 37-imi septemberip 11-niit 13-at ilanngullugu 2015-imi pisussanngorlugu pilersaarusiuleruttorpaat.

Aaqqissuussaq imigassartaqassanngilaq, akeqassanngilaq ilaqutariinnullu piukkussangaalluni, meeqqaniit inersimasunut utoqqarnullu aaqqissuussat assigiinngitsut pilersaarusiorneqaleruttorlutik. Sammineqarsinnaasut makkuupput: tusarnaartitsinerit, qititassianik takutitsinerit, isiginnaartitsinerit, asimi pinnguarnerit nereqatigiinnerillu.

Pilersaarutaavoq tamanut ammasuussasoq, piumasut umiatsiarlutik tuperiartorlutik peqataajartorsinnaassallutik. Katuap Arctic Umiaq Line suleqatigalugu inuit assartornissaanik periarfissinneqassapput, tassa:

- inuit sinersortaammut Sarfaq Ittuk-mut ilaallutik Qooqqunukarlutik, aaqqissukkap pingaarnerpaaffiani arfininngornermi niullutik peqataasinnaallutik namminerlu unnuineq isumagalugu aqaguanilu Sarfaq Ittuk-mik aaneqarlutik, imaluunniit

- sinersortaatip Nuup Kangerluanut ingerlaqqinneranut peqataallutik aqaguani ullaap tungaani sermersuup eqqaaneereerluni Qooqqut aqqusaarlugu Nuummut uteqqilluni.

Nuummiit aallarluni Arfininngorneq nal. 13:00

Nuummut tikilluni Sapaat nal. 21:00

Kingusinnerpaamik aallarnissamut 30 min. sioqqullugu umiarsualivimmiinnissaq piumasaqaataavoq.

Sarfaq Ittuk aqqutigalugu periarfissat toqqagassat:

Qooqquni nammineq unnuilluni

Akimut ilaavoq: Sarfaq Ittuk-mut ilaalluni Nuummiit Qooqqunut siumut utimullu angalaneq

Nerinerit Arfininngornemi: Ullup qeqqasiorneq

Sapaat: Unnukkorsiorneq

Akimut ilaanngillat: Umiarsuarmi unnuineq aamma nerinermi imeruarsaatit.

Akia Inersimasumut inummut ataatsimut: DKK 1.150 - Meeraq ukiui 0 – 11 DKK 250

Umiarsuarmi unnuilluni

Akimut ilaavoq: Sarfaq Ittuk-mi unnuilluni Qooqqunut Narsap Sermianullu angalaneq

Nerinerit: Arfininngorneq: Ullup qeqqasiorneq

Unnukkorsiorneq

Sapaat: Ullaakkorsiorneq

Ullup qeqqasiorneq

Unnukkorsiorneq

Akimut ilaanngillat Nerinermi imeruarsaatit

Akit inummut ataatsimut Ineeqqami DKK 2.500, minn. marluk Meeraq ukiui 0 – 11 DKK 500

Ammaannartumi DKK 2.000, oqorutitalik Meeraq ukiui 0 – 11 DKK 500

Guideqarluni kangerlummi angalaarneq Qooqqut Festivalimukarnerlu

Targa 37+ angallassinermut akuerisaasoq 12-nik ilaasoqarsinnaasoq aqqutingalugu Qooqqut Festival Peqataaffigiartoruk.

Angalanissaq:

Arfininngorneq septemberip 12-at 2015

12:00 Nuummiit aallassaaq.

Nuup Kangerluani angalaarneq

Sila apeqqutaalluni sumunnarfiit aaliagerneqassapput.

Aqqutaani oqaluttuarineqarumaarput nunalerinermut tunngasut, oqaluttuarisaaneq, aalisakkanut uumasunullu tunngasut.

Uniffigineqartarumaarput piffiit immikkuullarissut soorlu nunarsuarmi ujarak pisoqaanerpaaq, kuussuaq, ilulissallu. Arferit ulloq taanna takussaassappata aamma isiginnaarneqarsinnaajumaarput.

15:00 Qooqqut Festivalimut apuunneq

20:30 Qooqquniit aallarneq

22:00 Nuummut apuunneq

Akia inummut ataatsimut kr. 1.500,00

Minnerpaamik ilaasorisinnaasat: 8

Sap. ak. marluk sioqqullugit angalanissaq qulakkeersimanersoq nalunaarutigineqassaaq.

Angalaarnerup nalaani kaffi, tii akeqassanngillat aammalu akisaasat tippillu atorneqarsinnaajumaarlutik.

Angalanissamut billetsit Katuap saaffiginnittarfiani pisiarineqarsinnaapput: ataa.-tall. 11.00 – 16.00. Pisiffissaq kingulleq tallimanngorneq septemberip 4-aat. Billetsinik tuniniaaneq aallartereerpoq.

Aliikkusersuinerit aallartinnginnerini ilaquttatillu assigiinngitsunik sammisaqarsinnaavusi.

Qooqquni Sammisassat:

Timi Asimi

Qisuit pingasut ataasinngortillugit, arf. 12/9 nal. 10:00 arsaattarfimmi

Qisuit pingasut atorlugit eqqarsaqqissaarluni ilaqutariit suleqatigiillutik qisuk allunaasarlu atorlugit ataasiinnanngortissavaat. Uani ilaqutariittut suleqatigiilluarsinnaaneq ataqatigiinnerlu misiligarneqarsinnaapput.

Killumut tiiliorneq, arf. 12/9 nal. 11:00 kuup eqqaani

Ilaqutariit suleqatigiillutik ilaqutariikkaarlugtik killulioriarlutk tiilioqqaanniutissapput. Ilaqutariit tiilimik qalasseqqaartut ajugaassapput.

Pisissaarneq, arf. 12/9 nal. 14:00 illuaqqat eqqaanni

Pisissaarluni nakerneqqusaanneq.

Qoqqut 4 x 400 m stafet, arf. 12/9 nal. 15:00 Tupersuup silataani

Iligiikuutaarluni arpanneq. Uani ilaqutariit 400 m-rikkaarlugit arpaliutissapput

Qooqqut minimarathon 3 km, arf. 12/9 nal. 16:00 Tupersuarmi silataani

Qooqqup sissaa sinerlugu inuummarissarluni 3 km arpanneq

Høvdingebold, arf. 12/9 nal. 16:30 arsaattarfimmi

Meeqqat, inuusuttuaqqat, inersimasut utoqqasaallu tamarmik tikilluaqqusaapput arsamik aqittumik ikilisaalluni unammiuaarnermut

Anaalerunneq, arf. 12/9 nal. 16:30 arsaattarfimmi

Anaaleruserluni arsaaqqamik pattaanneq tamanit peqataaffigineqarsinnaasoq

250 gram-imik igeriussineq, arf. 12/9 nal. 16:30 kuup eqqaani

Arsaq 250 gr-imik oqimaassusilik atorlugu ungasinneqqusaalluni naloriussisaqattaanneq.

Aqarnermik sammisaqarneq, arf. 12/9 nal. 14:00 Scenep eqqaani

Kalaallit uagut immikkuullarissutigaarput, ingammik meerartatsinnut aqarsisaqaratta. Inoqatinut aqarsisarneq itisuumik inummut sunniuteqartartoq Qooqqut festivalip ingerlanerani sammineqassaaq. Sammisaqartitsisuussaaq quiasaarisartoq isiginnaartitsisartorlu aqarsinermik pikkoriffeqartuunini tunuliaqutigalugu Rosa Olsen. Rosa nammineq inuunini naallugu aqarneqartarpoq, sulilu aqarneqartarluni. Rosa aqarsinermi periutsinik ulikkaarami aqarsinissamut isumassarsianik nutaanik tunniussuissaaq. Aqarsineq eqarnarilaarpiuk? Aqarsinissamut isumassanik nutaanik pissarsiaqarusuppit? Aqartikkusuppit? Qanoq aqassillaqqitsiginerlutit tusartikkusuppiuk? Una sammisaqarneq ilaqutariinnut tamanut tulluarsagaavoq, unnuamigooq meeraaqqerivimmiittut allaat aqarsisartut.

Una sammisaqartitsineq ilaqutariinnut suli atualinngitsunik meerartalinnut tulluarsagaavoq

Allunaariarfimmi misileraaneq, tall. 11/9 nal. 16:00 & arf. 12/9 nal.10:00 allunaariarfimmi

Qajartornermi timip makittarissinnissa pisaqariaqarpoq, timimi makissaartissinnaanngikkaanni kinngusoortoqarsinnaavoq. Qajartortartut qajartornermi timip makissarissaartinnissaa sungiusarlugu allunaariarfimmi timi nukittorsartarpaat. Peqatigiiffik Qajaq suleqatigalugu allunaariarfik nappaqqavoq, tassanilu allunaariarfimmi ilitsersuisoqarluni misilittaanissamik periarfissaqassaaq.

Una sammisaqartitsineq ilaqutatiinnut atualereersunik meerartalinnut tulluarsagaavoq.

Qaannap atortui pillugit nassuiaaneq, arf. 12/9 nal. 16:00 tupermi

Qaannap, Kalaallit Nunaata pinngortitaanut tulluarsagaalluni suliaasup, sananeqaataa atortuisalu suuneri nassuiarneqassapput. Meeraallunini qajartortartoq Jakob Peter Enoksen inuusuttuaraallunili qaanniortup qaannap atorluti pillugit nassuiaassaaq. Qajaq inikikkaluarluni inunnit matematikkillaqqissorsuarnit ineriartortinneqarpoq.

Una sammisaqartitsineq ilaqutatiinnut atualereersunik meerartalinnut tulluarsagaavoq.

Linedance kalattuullu, arf. 12/9 nal. 16:00 Scenep eqqaani

Peqatigiiffik Pakkalukkat Savalimmiormiunik linedancernermut pikkorissaasullit Qooqqut festivalip nalaani linedancernermik pikkorissaassapput. Qiteriaatsimi USA-meersuni aalariaatsit assigiiaat inuit qitittut aallaavigalugit qitittarput. Ukiarsalernerani qiianarsilaartareersumi uunnassaatitsialak! Pikkorissarnermi peqataasut unnukkut nipilersortoqarnerani ilikkarsimasaminnik takutitsinissaanik periarfissaqassaaq.

Una sammisaqartitsineq ilaqutatiinnut atualereersunik meerartalinnut tulluarsagaavoq

Stomp, arf. 12/9 nal. 10:00 pinnguartarfimmi

Nipilersornermi periuseq immikkuullarissoq aallaavigalugu ilaqutariinnut tamanut sammisaqartitsineq. Atortut nipiliuutit Qooqquni nassaarineqarsinnaasut atorlugit nipiorluni nipilersoqatigiinneq ingerlanneqassaaq. Sammisaqartitsisuussaaq erinarsortartoq Dida G. Heilmann.

Una sammisaqartitsineq ilaqutatiinnut suli atualinngitsunik meerartalinnut tulluarsagaavoq.

Meeqqat erinarsuutaat pinnguaatitallit, arf. 12/9 nal. 13:00 pinnguartarfimmi

Meeqqat erinarsuutaat pinnguaatitallit uani sammineqassapput. Erinarsuutit tamarmik immikkut pinguaatitaqartarput assigiinngitsunillu aalariaaseqarlutik. Uani erinarsorlutik pinnguartuni meeqqat angajoqqaat aanaakkut aataakkullu ataatsimut pinnguaqatigiinnissaannik periarfissiissaaq.

Una sammisaqartitsineq ilaqutatiinnut suli atualinngitsunik meerartalinnut tulluarsagaavoq.

Eqqumiitsuliorneq, arf. 12/9 tupersuarmi

Eqqumiitsuliornermi sammisaq: Tuttu nal. 10:00

Pikkorissaanermi ilaqutariit ataatsimoorlutik tuttunik titartaanermik misieraassapput. Taamaasioreerunik ujaqqat angisuut atorlugittuttuliussapput orpikkat qaqortumik qalipallugit. Atortut atoqqinneqarsinnaasut atorlugit tuttuaqqanik sanariarluni pinnguarneq.

Eqqumiitsuliornermi sammisaq: Aalisagaq nal. 13:00

Pikkorissaanermi aalisagaq sammineqassaaq

Uani ilaqutariit aalisagaq titartarlugu misileeqqaariarlutik orpikkat annoraamerngillu atorlugit qilersuullugit aalisagaliussapput. Angajoqqaat meeqqallu akornaminni aalisakkamik isiginnittaasiat eqqartorneqassaaq misiligarneqarlunilu.

Una sammisaqartitsineq ilaqutariinnut mikisunik meerartalinniit inuusuttuaqqanik meerartalinnut tulluarsagaavoq

Qooqquni aliikkusersuisussat ilagaat:

Ajinai (Mongolia)

Nipilersoqatigiit Ajinai, Beijingimi ukioq 2009 pilersinneqartoq Kina tamakkerlugu aggersitanik peqataaffigineqarpoq kissaatigalugu ileqquussumik mongoliamiut nipilersoriaasiata 21. århundredimi aamma pigiinnarneqarnissaa.

Nipilersoqatigiit sorlaat mongoliami narsaamanersuarmeersuupput peqataasullu inuusunnerannit misilittagarisaanniillu tunngaveqartumik ileqquusumik nipilersoriaaseq nutaalianik akoorneqarsimavoq. Nipilersoqatigiit nipiliuutaanni qitiuvoq Morin khuur, agiaq histip niaquatut ilusiligaq (mongoliamiut nipiliuutaat peqingasoq tagiuserluni atorneqartartoq), mongooliamiut nipiliuutaanni pingaarnerpaatut inissisimasoq inuiannut ilisarnaatitut pigineqartoq aammalu khoomei, torlorsorneq, mongoliami inuiaat eqimattakkuutaartut ataasiakkaat nipaannik ataatsimoortitsinermik pilersitsinerusoq.

Khoomeip Morin khuurillu nipaat aallaaveqarput pinngortitap nipaanik assiliilluni ilaarsinissamik kissaateqarnermit. Ajinaikkut nipilersornerat tusaallugu soorluli tassa narsaamanersuarnut nuunneqaannallarluni piffimmut guitarit innaallagiatortut takkutinngerujussuarallarmata pisunut. Nipilersoqatigiinni peqataasut Kinap illoqarfissuisa pingaarnersaanni, Beijingimi, rockertarnermit misilittagaqartuunerat tunngavigalugu nipilersorneq nutaalianik akoorneqarpoq, nipilersornerullu tillernera hiisternerup ingerlaasianut eqqaanarpoq rockernermi qatitoornermik tillernermillu akuugaalluni. Aamma tusaasami innaallagiatortumi guiutarernermut assingusoq akuliuttarpoq. Taamatut qangarsuummalli ileqquusimasunik aammalu nutaaliamik nipilersoriaatsimik suleqatigiissitsinermi nutaanngitsut nutaallu akuleriissinneqarput, piffissamik inissiiuminaatsitsisumik, nipi nipilersoqatigiit Kinami nipilersornerup silarsuaani qaffakkiartornerannik malitseqartumik.
Ajinai nipilersorfinni pisoqarfinnilu anginerusuni nipilersortarput tusarnaartitsillutillu angalasarlutik Asiami, Europami, Nordamerikami nunarsuattalu sinnerani festivalinut.

Atiat Ajinai Indiamiut oqaasitoqqaanneersuuvoq isumaqarluni hiisti angutiviaq ataqqinartorsuaq iluanaartitsitsisartoq. Oqaluttuatoqqani oqaluttuarineqarpoq Indiami Kunngi qorsorpaluttumik qalipaatilimmik takoranneqisumik hiistiuteqartoq. Upperisaq Buddhisme Mongoliamut eqqunneqarmat Ajinai isumaqartinneqalerpoq hiisti angutiviaq angisooq. Oqaluttuatoqaq taaneqartoq ulloq manna tikillugu eqqaamaneqarluarpoq.

Soorlu ukiorpassuit matuma siorna mongoliamiut siuaasaasa ileqqorisimagaat Ajinaikkut nipilersornermikkut kultuurit allat iluini immikkuullarissutsit tamaasa tikilluaqquaat tamakkulu nipilersoriaatsiminni sorlaritillugit. Ajinaillu nipilersoriaasertik immikkuullarissunngorsartuarpaat, upperisarsiorpalartuutinnagu killeqarfittullu ittunik sinaakkusersuiffiginagu.

Jenseeraq

Jenseeraq Olsen nunatsinni nalunnginneqarlualernikoq nipilersoqatinilu Qooqqut Festival-imi appittussanngorpoq.
Nuuteeraliaa ”Qaammatip Tungaanut” 2012-imi saqqummermat ingerlaannaq nuannarineqarluarlerpoq, KODA-miillu pitsaassutsimigut qaffasinnerpaatut nalilerneqarluni. Kisimiilluni saqqumersitsiinnarnikuunngilaq, nipilersoqatigiinni ”Uummat”-mi marloriaq saqqummersitsinikuusuni aamma pingaarnertut inissisimammat. Tassanilu KODA-miit nuuteeraliaat ”Tusaannga” tunngavigalugu 2011-mi isumalluarnartutut naliligaallutik.

Maalia & Rosa

Qooqqut Festivalimi nuannaarutigalugu nalunaarutigisinnaavarput isiginnaartitsisartut quiasaarisartullu nuannarineqarluinnartut Maalia aamma Rosa aliikkusersuisussanngormata.
Rosa (Dariisiatut nalunnginneqarlualernikoq) Maalia peqatigalugu isiginnaagassiartik ”Periarfeerussaq” sinerissami angalaaruppaat, nuannarilluarneqarneratalu kingorna ”Periarfeerussaq Special” pilersaarusiorneqalereersimalluni.

Nikolaj Lønstrup

Nikolaj Lønstrup Qaqortuminngaanneersuuvoq nuuteeqqamik erinnallu ataasiakkaat iTunes aqqutigalugu saqqummersitsisimalluni meeqqat inuusuttullu nuannarillualersimavaat.
Nikolaj Kodap Isumalluarnartumut Nersornaataanut 2013-2014-imut toqqarneqartut ilaraat, qularnaranilu siunissami saqqumilluarumaassasoq.
”Kalaallit Nunaat Tivolimi” (GiT) Københavnimi ukiut tamaasa pisartumut Nikolaj appisimaarpoq, tamannalu Kalaallit appisimaarfigisinnaasaanni annerpaat ilaattut taaneqartarluni.
Nuannaarutigalugu nalunaarutigisinnaavarput Nikolaj Lønstrup Qooqqut Festivaalimut peqataassammat arfininngornermilu appisimaarnissaa qilanaarilereersinnaallutigu.

DIDA

Dida 2008 aamma 2012-imilu CD-mik saqqumersitsitsinikuuvoq amerlanerpaartai nammineq erinniaralugillu taalliarinikuullugit. KODAp Isumalluarnartumut Nersornaasiuttagaanut taaneqartunut 2012-imi ilaanikuuvoq, ulluinnarnilu Nuummi PI/SPS-imi ilinniartitsisutut sulisarluni. Ukiuni 15-ini meeqqanut inersimasunullu aliikkusersuisarsimavoq, nuannaarutigaarpullu Qooqqut Festivalimi aamma aliikkusersuissammat, tallimanngornermi tupermi appisimaassammat arfininngornermilu ilaqutariinnut assigiinngitsunik workshopertitsissalluni.

Maalia & Juuna

Maalia Juunalu Iluliarmiuupput ukiut tallimat sinnerlugit appisimaaqatigiittalersimasut allat peqatigalugit. Maannakkullu marluullutik pisunut assigiinngitsunut appisimaariartalersimaput nipilersuutit immiuteriikkat tunuliaqutsiullugit. Pisunut tulluussallaqqissuupput, sumiiffimmiinnerlu naleqqussarfigilluartarlugu.
Nipilersukkat akornisigut Maalia oqaluttuanik takorluukkanilluunniit nuannersunik timini iluaqutsiullugu oqaluttuartarpoq.
Juuna Maalialu illarumatuujugamik nuannersunik ujaasineq pikkoriffigigamikku qularnanngilaq Qooqquni nuannisartitsiumaartut.

Marti Kuulumaallu

Martin Kuulumaallu Nuummi linedancertitsisinnaanermikkut kalattoortitsisarnermikkullu nalunnginneqartuupput, katersuuffinnilu assigiinngitsuni nipilersortartutut qititsitsisartutut saaffigineqarluartarlutik. Inuiattut ullorsiornitsinni Nuup Saavani Nuummi innuttaasut amerlasoorpassuit kalattoortippaat, inuit assut nuannisartillugit. Marti Kuulumaallu nuannaarutigalugu oqarsinnaavugut nipilersuutitik nassarlugit Qooqqut Festivalimut peqataassammata - Qooqquni takuss!

Pilersaarutit:

Tallimanngorneq 11. september             Nal.                                             Sumi

Allunaariarneq                                                   16:00 – 17:00                             Allunaarniarfik

Unnussiuaarneq,                                               19:00                                           Tupersuaq      
Oqaluttuaqattaanneq
Dida appisimaassaaq                                           

Arfininngorneq 12. september                Nal.                                             Sumi

Ilaqutariit                                                           10:00 – 12:00                             Tupeq
eqqumiitsuliaat – Hold 1

Timersorluni                                                      10:00 – 11:00                             Arsaattarfik
unammiuaarnerit                                                 

Allunaariarneq                                                   10:00 – 12:00                            Allunaarniarfik

Ujaqqanik qiperuineq/ Peter                           10:00 – 18:00                            Neriniartarfiup silataani
Kujooq 

Timersorluni                                                      11:00 – 12:00                            Kuup eqqaani
unammiuaarnerit

Stomp / Dida                                                      11:00 – 11:30                             Pinnguartarfimmi

Qaannap atortuinik                                            13:00 – 14:00                            Tupersuaq
nassuiaaneq

Ilaqutariit                                                            13:00 – 15:00                            Tupeq
eqqumiitsuliaat – Hold

Meeqqat erinarsuutaat/ Dida                            13:00 – 13:30                            Pinnguartarfik

Aqarnermik sammisaqarneq/ Rosa                 14:00 – 15:00                            Scenep eqqaani

Pisissaarneq                                                        14:00 – 15:00                           Illuaqqat silataanni

4 x 400 meter stafet                                           15:00 – 16:00                            Arsaattarfik

Qaannamik misiliineq                                       15:00 – 18:00                            Sissami

Linedans workshop                                            16:00 – 17:00                            Scenemi

Mini maraton 3 km.                                           16:00 – 16:30                            Arsaattarfik

Høvdingebold                                                     16:30 – 17:00                            Arsaattarfik

Timersorluni                                                       16:30 – 17:00                            Kuup eqqaani
unammiuaarnerit                                               

Maalia & Rosa                                                    17:00 – 18:00                            Scene

Nikolaj Lønstrup                                                18:00 – 19:00                            Scene

Maalia & Juuna                                                 19:00 – 20:00                            Scene

Martin & Godmand                                           20:00 – 21:00                            Scene

Ajinai                                                                   21:00 – 22:00                           Scene

Jenseeraq                                                            22:00 – 23:00                           Scene

Sapaat. 13. september                                 Nal.                                            Sumi

Arpanneq – 2 km.                                              09:00 – 10:00                           Arsaattarfik

Aningaasaliisut

Qooqqut Festivalip ingerlanerani ukua aningaasaleeqataapput:

Nipilersortunut eqqumiitsuliortunullu imernik tapiipput:

Pingaarnertut aningaasaliisut:

Isiginnaartitsineq kiassutsip silarsuaani pissaaq, nunarsuarmi inuullu kiassusaa sammineqassalluni. Pinngoqqaartut marluk imeq aamma siku aallaavigalugu timi atorlugu takutitsisoqassaaq

Sermermiit Aalamut (From Ice To Steam)

Isiginnaartitsineq kiassutsip silarsuaani pissaaq, nunarsuarmi inuullu kiassusaa sammineqassalluni. Pinngoqqaartut marluk imeq aamma siku aallaavigalugu timi atorlugu takutitsisoqassaaq

Nutaarsiassanik pisartagaqalerit

Cookies

katuaq.gl bruger cookies

Cookies er nødvendige for at få hjemmesiden til at fungere og giver info om, hvordan du bruger vores hjemmeside, så vi kan forbedre den både for dig og for andre. katuaq.gl bruger primært cookies til trafikmåling, login og optimering af sidens indhold. Hvis du klikker videre på siden, accepterer du vores brug af cookies.